Gullad ka Ped

Raat ke kuch 11 baje honge use yaad aaya ki gaadi bahar khadi hai aur choriyaan badhti jaa rhi thi. Neend main behaal woh utha, chappal pehni aur chabhi utha kar bahar nikla. Darwaze ke us par ek choti si CFL jal rahi thi aur mausam thanda sa tha. Sardi ke aasar in dino ke saath badhte jaa rahe the, pehle subah aur raatein kuch thandi hoti aur fhir dekhte dekhti hi dilli main sardiyaan aajati.

Haan toh woh apne doosre maale se neeche utra aur dekha ki pehle maale par andhera ho raha hai, bahar kuch motorbike ke jaane ki aawaz aayi. Hawa tez this toh laga ki neeche kuch hai, neeche utarne par billi ko jaate dekha. Hairaani ki baat thi ki is waqt aas pados main sab shaant tha, lighte band ho chuki thi.

Gate ki kundi kholkar bahar aaya toh sadke khali aur upar ek bada sa streetlamp jal raha tha. Paas hi Gullad ka ped aur uspar mandrati hui chimkadar thi. Ab neend kuch ud si gayi thi, yeh pehli baar tha ki bahar ki hawa thandi lag rahi thi itni lambi garmiyon ke baad aur sadke khali aur sunsaan thi. Alag hi lutf hai raat ka aur khamoshi ka. Gaadi main chabhi lagayi aur fm par kuch puraane gaane chal padhe. Yeh janab kuch der baithe is chote lamhe ka maza liya aur fhir.

Fhir kya, reverse main gaadi park ki kyunki bhai agle din subah daftar ko fhir se jaana tha na!

 

Khoye Log

Kya yeh khoye hue log kabhi milte hai?
Kya hota hai inka koi thikana?
Woh jisko maine
Dekha aaj haath failate hue
Traffic signal par
Kya woh ho sakta hai
Ek khoya hua?

Kya yeh khoye hue log milte hai kabhi?
Bheed bazaro main
Beech sadak par
Ya fhir khali masjid
Ye khali mandir main?

Kya woh bhi khoya hai
Jo din raat daudta hai
Cinema jaata hai
Bahar khana khata hai
Aur der raat ghar aakar sojata hai?

Kya khoya woh bhi hai
Jo maikhane mai
Dhund rehta hai?
Jo cigarette ke kash par kash lagata hai?

Kya yeh khoye hue log milte hai kabhi?
Kya yeh khoye hue log milte hai kabhi?

Hasi

Tumhare chehre par hasi to thi

Par tumhari aankhen kuch

Aur keh rahi thi

Shayad kuch thaki si thi

Tumhara chehre par hasi to thi

Par tumhare andaz

Kuch alag se the

Aaj tum chup se the

Aaj tum- tum se na the

Waqt ke saat

Raasta beet ta gaya

Main chalta raha

Tu bhi chalta gaya

Ruka na tu

Ruka na mai

Chehre par tere

Chehre par mere

Hasi to thi

Par hamari aankhen

Kuch thaki si thi

Tumhare chehre par hasi to thi…

Raat

Sard raaton mai
Tum syahi ki tarah
Kuch ghul se gaye the

Rang tumhara
Halka toh hua tha
Par woh nasha ab bhi tha
Woh mehek gayi nahi thi

Sard raaton mai
Tum syahi ki tarah
Kuch ghul se gaye the

Maine chaha poochna tum se
Par tum tez chale jaa rahe the
Tumse kadam milana
Mumkin na tha

Sard raaton mai
Tum syahi ki tarah
Kuch ghul se gaye the

Hope Umeed

Umeed mere doston kuch aisi hai ki jaise raat ke andhere mai ek badi deewar aur usme ek khidki.

Main aur shayad aap bebas us deewar ke saamne khade hai. Na main aapko jaanta hun na aap mujhe jaante hai toh aakhir yeh majra kya hai?

Ab raat ke andhere mai deewar ke saamne khade toh hai, khidki ki taraf ek aas lagaye hue. Ki kya pata koi isme aaye. Kya pata koi aisa ho jisko neend nahi aati aur woh tanhai ko kam karne ke liye raat ke andhere aur chamkeele aasman ka shara leta/leti hai?

Toh aage hona kuch nahi bas yuhi hai ki shayad us khidki main aaj ki raat hi koi aaye ya shayad kal ya kuch aur lambe waqt ke baad.

Lekin fhir aap mujhe dekhte ho aur main aapko, hum sochte hai aage badhne ki. Nayi deewar aur nayi khidki dhund ne ki. Shayad aap dusri disha mai jaate hai aur main doosri.

Umeed mere doston kuch aisi hai ki jaise raat ke andhere mai ek badi deewar aur usme ek khidki

Toh bas aap apni umeed banaye rakhe, main apni banaye rakhne ki koshish karunga

P.S. Aur haan zaroori nahi ki umeed koi insaan hi ho. Umeed to bahut si cheezo main hoti hai.


Aap log batae, kya hai aapki niji zindagi main jo aapko aage badhne aur acha karne ki umeed deta hai

Mez (Table)

Chote se kamre main kone ko ek mez rakhi hui thi. Raat ka waqt tha toh andhera laazmi tha. Us kone wali mez par ek lamp rakha tha. Us lamp ki roshni se mez par ralji kitaabe dikhi aur baaki samaan bhi. Woh kamre main ghusa aur dekha ki kamra thanda sa tha lekin pankha band tha. Mez par pahucha toh dekha khidki khul thi, neeche ek sunsaan gali thi jisme do kutte bhaunk rahe the.

Mez par kuch 6-7 kitaabe, 2 diary aur kuch lifafe padhe the. Ek diary uthai toh usme se ek syahi wali kalam giti. Lamp lekar usne kalam uthai aur wapis diary main rakhne laga. Ek pan-na khola toh us par kuch likha tha. Paas rakhi kursi kheechte hue usne diary ko tawaj-jo (importance) se padhna shru kiya….

Diary main likha tha, “Chote se kamre main kone ko ek mez rakhi hui thi…….”

-Jafar Rehman

Chupke se

Chupke se aati
Hai yeh yaad teri
Bhare dine main
Kahi jheeri se
Aakar sama jaati hai

Chukpe se aati
Hai yeh yaad teri
Mez par baithe
Kaam karte waqt

Chukpe se aati
Hai yeh yaad teri
Khana khate waqt

 

Raat ke andhere mai

Is raat ke
Andhere main
Aao tum kabhi
Chand ki roshni
Ke neeche
Saath baithkar
Baat karenge
Chai ke piyale
Ki tarah sab
Bikher denge
Woh chupe raaz
Aur saare darr
Is raat ke
Andhere main
Aao tum kabhi

 

Safar

woh kabhi kabhi
hota hai na
ki sab cheeze reh  
si jati hai

jaise yeh train
station se nikal rahi hai
sab kuch peeche chodte hue

andar ka mahaul kuch hai
aur bahar ka kuch


Agar aapne socha yeh ek poem hai toh aap shayad galat hai, yeh kuch bikhre hue khayal the mere socha yaha likh dun

Kaise hai aap sab?

Cigarette aur chai

Un sardiyon ki raaton main
Mere haath mai ek cigarette thi
Aur tumhare haath mai chai ka cup

Hum dono ek thele par baithe
Andheri sunsaan raat mai
Baate kar rahe the

Kohre ke saath
Hamare muh se dhuan nikal raha tha
Us hisaab se toh
Cigarette tum bhi pee rahi thi

Maine haskar yeh baat tumse kahi
Toh tumhe thoda sa bura laga

Mujhe ilm tha is baat ka
Ki tumhe cigratte pasand nahi thi

Ab woh waqt aa chuka tha
Jab tumhari chai khatam hone ko thi
Aur meri cigarette ke bhi
Kuch aakhri kash bache the

Fhir main utha
Aur tum uthi
Aur dono apni raah chal diye

Snapseed

Snapseed (1)